Desso ve vogio ‘contar queo che de vero
‘na volta nasseva dentro a sto squero.
E gondoe par tera col culo in sù
le veniva destirae
e gera cussì messe par esser giustae.
El squerarol el ghe stropava co la stopa e sfese
giutandose co penole e marteo
el modo el gera queo
par farle de novo star sora l’acqua del canal,
ma, prima de metarle a mogio
el ghe passava parsora la pegola de bogio
che su ‘na caldiera vecia infumegada
tuto el giorno sbrombolava impregnando
co la so spussa l’aria de tuta la salizada.
Apena i squeraroi molava de lavorar
noialtri putei dentro a sto squero andavimo a
zogar.
Alora el squero cambiava,
de sora ‘na gondola coverta pareciada
piena de specieti e de veludo dentro
da parer un tinelo da ricevimento
zogavimo ae signore
sercando de parlar beo, in cicara e piateo.
Ma, co veniva scuro, scampavimo desora
perché cambiava ancora
la scena de sto squero.
Desso, gera i gati i veri grandi atori,
i gera proprio lori,
dela note i veri “siori”.
I rivava da tute e cale vissine
e anca dai campiei
i pareva putei pronti a scorazar
dentro e gondole e parsora
come mati scalmanai i pareva deventai.
Noialtre spasemae dentro e case tornae
tiravimo e rece, voevimo capir
sto ciasso maedeto e sti zighi disperai
de sti gati inamorai,
da tanto che i zigava
parfin el sono ne passava.
Po’.... el ciaror de l’alba fasseva tornar
n’altro giorno novo, tuto da inventar:
i bravi squeraroi sempre più infumegai
tornava a lavorar,
noialtri putei, a scuola par studiar,
i gati povareti, sgrafai, stufi, desfai
i l’andava a riposar.

Mio pare gran tradisionaista
el voleva festegiar ogni ricorenza,
cussi’ un ultimo del’anno
el se geramesso in testa
de far ‘na bea festa.
Quel giorno el torna da lavorar
fasendo un dindio vivo
par el campieo scorasar
mi penso che ‘I me lo gabia portà par zogar
ma lu’ el me dize che el xe par magnar.
Mi me sento acaponar la pele,
smissiar e buele,
ma come? ghe domando se ti permeti.
No aver paura! el me risponde,
ghe penso mi a farghe tirar i spagheti.
El ciapa sta bestia par el colo
e ‘I ghe lo mete tra la sfesa de la porta,
tra do minuti, el dize, ti vedarà che la sarà morta.
Mi sero i oci, po’ torno a vardar
altro che morta
ea gera drio scorazar par tuta la casa
col colo a picandolon mata dal dolor,
da tanto che la saltava
la xe finia zo in strada,
par tera in mezo al campieo
qualchedun la gà finia col corteo.
No ve digo la mia disperazion
altro che festa
me pareva de aver asistio a ‘na esecusion.
Dopo sto tantin de scombussolamento ala sera
xe rivà el gran momento,
tuti intorno a la tola a festegiar
la paura ne ga fato desmentegar
quelo che de giorno ne gera capità.
El dindio gavemo magnà in compagnia
sercando de desmentegar e malore
del’anno vecio che l’andava via.